Օգտակար Խորհուրդներ «ԻՆԳՈ ԱՐՄԵՆԻԱ»-ից
Ի՞ՆՉ ԱՆԵԼ, ԵԹԵ ԿԱՍԿԱԾՈՒՄ ԵՔ, ՈՐ ՎԱՐԱԿՎԱԾ ԵՔ COVID-19-ով
ՔԱՅԼ 1 – Գնահատեք արդյոք Ձեզ մոտ Covid-19 կասկածելի դեպք է, թե ոչ՝ ըստ ստորև նկարագրված կասկածելի դեպքերի չափանիշների․
Կասկածելի դեպքերի չափանիշներ
- Առկա են սուր շնչառական հիվանդության ախտանիշներ՝ ջերմություն 37,1 և բարձր, համի և հոտի զգացողության կորուստ, հևոց, օդի պակասի զգացողություն, քրտնարտադրություն, թուլություն, մկանացավ, մարմնի կոտրտվածության զգացողություն։ Կասկածելի է համարվում անգամ վերը նշված գանգատներից միայն մեկի ի հայտ գալը, որն ուղեկցվում է ջերմությամբ, և չկա այդ իրավիճակի այլ բացատրություն:
- Վերջին 14 օրվա ընթացքում ունեցել եք շփում հաստատված կամ հավանական COVID-19 դեպքով անձի հետ
- Առկա են ծանր սուր շնչառական ախտանիշներ՝ բարձր ջերմություն, հազ, հևոց, մկանացավ, որն ունի հոսպիտալացման կարիք և իրավիճակը չի բացատրվում այլ հիվանդությամբ
- Արդեն իսկ դրված թոքաբորբ ախտորոշումը,
- Բուժաշխատողներ, ովքեր աշխատում են որևէ հաստատությունում և ունեն ՍՇՎ-ի ախտանիշներ,
- Նորածիններ, ովքեր ծնվել են հաստատված COVID–19 վարակ ունեցող ծննդկանից,
- Ծննդկաններ կամ հղիներ՝ ջերմությամբ և գրիպանման երևույթներով
ՔԱՅԼ 2 – Եթե ունեք Կասկածելի դեպքերին բնորոշ չափանիշներից որևէ մեկը, ապա հեռախոսով կապ հաստատեք առողջության առաջնային պահպանման օղակի (պոլիկլինիկայի) թերապևտի հետ: Ներկայումս՝ համաճարակի պայմաններում, անկախ Ձեր հաշվառումից, եթե բնակվում եք այլ տարածքում կամ ունեք մարզի գրանցում կամ չեք հանդիսանում ՀՀ քաղաքացի, Դուք իրավունք ունեք դիմել Ձեր բնակության վայրին ամենամոտ տարածքային պոլիկլինիկայի թերապևտին:
ՔԱՅԼ 3 – Հեռախոսազրույցի ժամանակ բժիշկը գնահատում է ախտանիշները, ծանրության աստիճանը, ռիսկի խմբում լինելը, անհապաղ թեստավորման անհրաժեշտությունը, որից հետո կարող է՝
- սահմանել հսկողություն,
- կատարել տնային այց
- հրավիրել Ձեզ բուժհաստատություն:
Ռիսկի խմբին են դասվում այն անձինք, որոնք՝
- 60 տարեկանից բարձր են,
- ունեն նշված հիվանդություններից ցանկացածը՝ քրոնիկ սրտանոթային հիվանդություն, զարկերակային գերճնշում, շաքարային դիաբետ, թոքերի քրոնիկ օբստրուկտիվ հիվանդություն, իմունադեֆիցիտային վիճակներ, քաղցկեղ, ճարպակալում, քրոնիկ երիկամային անբավարարություն:
Եթե Ձեզ մոտ առկա է շարունակական բնույթ կրող 37․5 և բարձր ջերմություն, ապա պոլիկլինիկայի թերապևտն ուղեգրում է Ձեզ ռենտգեն քննության պետական պատվերի շրջանակում՝ թոքաբորբը հերքելու նպատակով, որի արդյունքներով կարող է կազմակերպվել նաև համակարգչային շերտագրություն կրկին պետական պատվերի շրջանակում։
Հսկողություն տնային պայմաններում
Անախտանիշ և թեթև ընթացքով COVID-19 հաստատված դեպքերի (որը կազմում է դեպքերի 75-80%-ը) հսկողությունը և բուժումը իրականացվում է տնային պայմաններում:
Տեղամասային թերապևտը սահմանում է 14-օրյա բժշկական հսկողություն և բացվում է անաշխատունակության թերթիկ, եթե արձանագրվում է՝
- Ջերմություն 37,1 և բարձր
- Համարվում եք COVID-19 հիվանդի կոնտակտավոր,
- Ընտանիքում կա COVID-19 հաստատված հիվանդ և գտնվում եք 14 օր մեկուսացման մեջ,
- Որպես կոնտակտավոր Ձեր անունը տրամադրել է Պարետը։
Տնային պայմաններում բժշկի հսկողության տակ գտնվող պացիենտը հիվանդության ողջ ընթացքում օրը 2 անգամ իր ջերմաչափման տվյալները և ախտանիշները հայտնում է տեղամասային թերապևտին։
Եթե 14 օրվա ընթացքում թերապևտի գնահատմամբ որևէ ախտանիշ ի հայտ չի գալիս, դեպքը համարվում է փակված՝ առանց COVID 19 թեստավորման:
COVID 19-ի բուժում հիվանդանոցային պայմաններում
Ձեզ անհրաժեշտ է բուժում հիվանդանոցում, եթե Դուք՝
- Ունեք միջին, ծանր և ծայրահեղ ծանր ընթացող COVID-19
- ունեք թեթև ընթացող COVID-19 և
- 60 տարեկանից բարձր եք, կամ
- հղի եք և ունեք ախտանիշներ, կամ
- ունեք քրոնիկ սրտանոթային հիվանդություն, զարկերակային գերճնշում, շաքարային դիաբետ, թոքերի քրոնիկ օբստրուկտիվ հիվանդություն, իմունադեֆիցիտային վիճակներ, քաղցկեղ, ճարպակալում, քրոնիկ երիկամային անբավարարություն։
Հոսպիտալացման ցուցման ժամանակ տեղափոխումն իրականացվում է միայն շտապ բուժ. օգնության մեքենայի միջոցով, հեռախոս՝ 1-03։
Այս պահին գործում է ՀՀ ԱՆ Տրիաժ (տեսակավորման) կենտրոն, որն իրականացնում է՝
- Իրավիճակի հավելյալ գնահատում կլինիկական ախտանշաններով նմուշառված և պատասխանին սպասող կամ չնմուշառված և կլինիկական ախտանշաններ ունեցող հիվանդների մեկ-օրյա հոսպիտալացում՝ մինչև պատասխանի առկայությունը
- Ուղղորդում ստացիոնար բուժման՝ համապատասխան հիվանդանոց։
Տրիաժ կենտրոնի հեռախոս՝ 8603, 010-860303։
Տրիաժ կենտրոն կարող եք դիմել նաև տնային պայմաններում վարվող COVID-19-ի մեղմ ընթացքի կտրուկ վատացման և պոլիկլինիկայի բժշկի անհասանելիության դեպքում: Ձեր գանգատների հիման վրա կստանաք համապատասխան ցուցումներ:
Օգտակար հեռախոսահամարներ՝
Շտապօգնություն՝ 1-03
Տրիաժ կենտրոն՝ 8603, 010-860303
ՀՀ ԱՆ Թեժ գիծ՝ 8003, 060-838300
